ரஷ்ய ஜனாதிபதியின் அழைப்பை ஏற்று வட கொரியா ஜனாதிபதி ரஷ்யா சென்றுள்ளார்.
அங்கு இரு நாட்டு ஜனாதிபதிகள் அதிகாரிகள் யாரும் இன்றி தனிப்பட்ட சந்திப்பொன்று சுமார் 4 மணி நேரம் இடம்பெற்றது.
கடந்த 2022 பெப்ரவரியில் இருந்து உக்ரைனுடன் போரில் ஈடுபட்டு வரும் ரஷ்யாவிற்கு ஆயுதங்களின் தேவை அதிகரித்திருக்கிறது.
அமெரிக்கா, ஜப்பான் மற்றும் தென் கொரியா ஆகிய நாடுகளிடம் வெளிப்படையான எதிர்ப்பை காட்டி வரும் வட கொரியாவிற்கு உணவு தானிய தேவையும், அந்நாட்டு இராணுவத்திற்கான அதி நவீன ஆயுதங்களுக்கான தொழில்நுட்ப உதவியும் தேவைப்படுகிறது.
எனவே, இரு நாடுகளும் பரஸ்பரம் உதவி கொள்ளும் நிலையில் உள்ளதால், ஒருவர் தேவையை மற்றவர் நிறைவேற்ற முடியும். குறித்த பின்னணியில் சந்தித்து கொண்ட தலைவர்கள் இருவரும் பரஸ்பரம் ஒத்துழைக்க முடிவு செய்துள்ளதாக தகவல்கள் வெளியாகியுள்ளது.
இந்நிலையில், இரு நாட்டின் பரஸ்பர இராணுவ ஒத்துழைப்பிற்கு அமெரிக்கா கண்டனம் தெரிவித்த நிலையில், வட கொரியாவிற்கு ரஷ்யா வழங்கப்போகும் அதிநவீன ஆயுத மற்றும் உளவு விண்கலத்திற்கான தொழில்நுட்ப உதவி, தென் கொரியாவில் போர் பதட்டத்தை உருவாக்கி இருக்கிறது. இது குறித்து தென் கொரியாவின் வெளியுறவுத்துறை அமைச்சின் ஊடகப் பேச்சாளர் லிம் சூ-சுக், அறிக்கை ஒன்றை வெளியிட்டுள்ளார்.
குறித்த அறிக்கையில்..,
“உலக நாடுகளின் எச்சரிக்கையையும் மீறி விண்கலன் மேம்பாடு மற்றும் பரஸ்பர இராணுவ ஒத்துழைப்பு ஆகியவை குறித்து இரு நாட்டு அதிபர்களும் பரஸ்பரம் ஒத்துழைக்க முனைவது குறித்து தென் கொரியா கவலையும், வருத்தமும் தெரிவிக்கிறது.
அணு ஆயுத மற்றும் ஏவுகணை மேம்பாடு சம்பந்தமான அறிவியல் மற்றும் தொழில்நுட்ப ஒத்துழைப்பில் ஈடுபடுவது ஐ.நா.சபையின் தீர்மானங்களுக்கு எதிரானது. வட கொரியாவிற்கு இராணுவ ஒத்துழைப்பு அளித்தால், தென் கொரியாவிற்கும் ரஷ்யாவிற்குமான உறவில் எதிர்மறையான தாக்கங்கள் ஏற்படும் என்பதை ரஷ்யா உணர வேண்டும்,” என்று அதில் குறிப்பிடப்பட்டு இருக்கிறது.
