திருகோணமலை, ஜூலை 23 – திருகோணமலை மாவட்டம் பட்டினமும் சூழலும் பிரதேச செயலாளர் பிரிவில் உள்ள முத்துநகர் பகுதியில், 800 ஏக்கர் காணியில் 53 ஆண்டுகளாக விவசாயம் செய்து வந்த 1,000க்கும் மேற்பட்ட குடும்பங்கள், தற்போது நில அபகரிப்பு ஆபத்தில் உள்ளதாக எதிர்க்கட்சித் தலைவர் சஜித் பிரேமதாச தெரிவித்துள்ளார்.
துறைமுக அதிகார சபை மற்றும் சூரிய மின் சக்தி நிறுவனங்கள் மூலம் இந்த நிலங்களில் சூரிய மின் உற்பத்தி திட்டம் முன்னெடுக்கப்படுவதால், விவசாய நிலங்கள் படிப்படியாக கையகப்படுத்தப்படுகின்றன. ஏற்கனவே 200 ஏக்கர் நிலம் வழங்கப்பட்டுள்ள நிலையில், பயிர் செய்கை இடையூறுக்கு உள்ளாகியுள்ளது என்றும் அவர் சுட்டிக்காட்டினார்.
Citizen Voice வேலைத்திட்டத்தின் கீழ், முத்துநகர் விவசாய அமைப்புக்களின் பிரதிநிதிகள் எதிர்க்கட்சித் தலைவர் அலுவலகத்தில் நேற்று (22) சந்திப்பு மேற்கொண்டபோது, பிரச்சினையை நேரடியாக முன்வைத்தனர்.
சஜித் பிரேமதாச தனது கருத்தில்,
- விவசாயிகளுக்கு நட்டஈடு வழங்கப்படவில்லையென்றும்,
- அவர்களுக்கு சான்று அல்லது காணி உரிமை வழங்க மறுக்கப்பட்டுள்ளதாகவும்,
- மாற்று நிலம் அல்லது பயிரிடும் அனுமதி வழங்கப்பட வேண்டுமெனவும் வலியுறுத்தினார்.
மேலும், நான்கு வாவிகளில் மூன்று மட்டுமே எஞ்சியுள்ளன என குறிப்பிட்ட அவர், வாவிகள் உடைக்கப்பட்டு அழிக்கப்பட்டுள்ளதையும், இது ஒரு பாடசாலை, கோவில்கள் உள்ளிட்ட சமூக ஆதாரங்களை பாதிக்கக்கூடியதென்றும் தெரிவித்துள்ளார்.
இது தொடர்பான பிரச்சினையை பாராளுமன்றத்தில் விரைவில் முன்வைக்க உள்ளேன் என அவர் உறுதியளித்தார்.
